Zulu warrior vs. Filipino flash

Kumbati na karong adlawa nila ni four-division world champion 'The Filipino Flash' Nonito Donaire Jr. ug ni South African   Jeffrey 'Mongoose Mathebula alang sa unification bout sa WBO ug IBF superbantamweight belts.

Nakanindot niini kay sa "neutral" nga binyu himuon ang away didto sa Home Depot Center sa California, USA. Nagpasalamat ko kay kun sa Johannesburg (South Africa) pa kini duwaa, kinahanglang mabakol o ba kaha i-knockout for good sa usa ka bisitang boksidor ang usa ka South African una pa kini makadaog didto. Daghan naman gud mga Pinoy boxers nga misulong didto ang nangapilde tungod sa grabeng kasayon sa mga judges paghatag og "hometown decision" bisan makapila pa pakamanga ang ilang kababayan.

Kun buot susihon og maayo, nindot baya ni nga pagsuway kang Donaire tungod kay mas taas kaniya og pipila ka pulgadas ang Mathebula, apan yagpis kini'g lawas. Wala kaayo ta masuhito kaniya.

"Mongoose" daw siya, ang mongoose usa ka matang sa hayop sa Africa nga mokaon og halas. Abtik kini og mga kamot (unahang tiil) nga mokawras sa bisan unsang matang sa halas (apil na cobra) ug   paakon pinaagi sa iyang bangkil.

Sumala pa sa Ring Magazine, si Mathebula ikaunom sa ilang listahan sa labing maayong super bantamweight boxer. Si Donaire hinuon ikaupat sa best pound-for-pound boxer sa kalibotan.

Si Mathebula dunay dugo sa bangis nga Zulu Tribe sa Africa. Makita bitaw na sa iyang height, ang mga Zulus nabantog usab dili lang sa kabangis tungod usab kini sa ilang mga height.

Hinuon dili man ni tinigbasay ug pinanaay, labaw nang dili basketboli. Si Donaire may gitas-on nga 5-foot-6, samtang si Mathebula 5-foot-11.

* * *

Gusto gyud ko nga makakita niining gibansagan og "Clash of the Former Titans" sa Hulyo 14 diha sa Cebu Coliseum sa umaabot nga Ground & Pound VI: Invincible.

Kay dili kini basta mga fighters ang mag-abot gawas sa mga batan-ong fighters magsangka usab ang mga ‘haligi’ sa Cebu kickboxing nga sila si Allan 'The Dancing Man' Epile sa Soma KBC ug sa karibal niya kaniadto si Ben 'Durex Warrior' Torbiso sa Durex Dragon KBC. Ang duha pulos founders sa ilang tagsa ka clubs.

Giingong duna nay karaang ‘panagdumot’ kining duha ka mga fighters nga kun nahitabo pa 20 ka tuig na ang nakalabay, sus, kumbati siguro kini og maayo.

Ang duha pulos man nanganting ipakita ang ilang mga abilidad, si Torbiso 60-anyos na, samtang mas bata pa si Epile nga nagpangedaron og 42-anyos.

Ang ako lang gikabalak-an ani ang ‘rayuma’ ug uban pang dinalang balatian sa tawong nag-edad na, kay bisan tuod praktisado duna man guy gitawag nga “wear and tear” factor.

Hinuon si Bernard Hopkins sa edad nga 46, maoy labing tiguwang nga nahimong kampiyon dihang iyang gilupig ang 28-anyos nga si Jean Pascal. Si Randy 'Natutal' Couture sa edad nga 49 mao sab ang labing tiguwang nga na-champion sa UFC.

Dili man tuod ni championship bout ang ila ni Epile ug Torbiso pero ang ato na lang ani malingaw gyud ang mga tawo sa ilang panagsangka and at the same time makapahuwas sila sa ilang ‘panagdumot’ sud sa dugay nang panahon.

* * *

PAGTULON-AN: Kun kanunay kang magbutang og limitasyon sa tanan nimong buhaton, mokatag kini sa imong trabaho ug kinabuhi. Kinahanglang imoha kining malingkawasan. — Bruce Lee

[email protected]