CEBU, Philippines - Usa sa mga highlights sa umaabot nga 12th World Eskrima Kali Arnis Federation (WEKAF) Championship mao ang paghatag og pasidungog sa 20 ka Grandmasters, kinsa ibayaw na ngadto sa Martial Arts Hall of Fame sa Hulyo 18-24 didto sa Cebu International Convention Center (CICC) sa Mandaue City.
Sugdan ang usa ka semana nga kalihukan pinaagi sa pagbendisyon sa bag-ong Eskrima Temple didto sa Doce Pares Mountain Park sa Brgy. Malubog, Cebu City.
Kini pa lang ang ikaduhang martial arts temple sa Asya sunod sa Kung Fu Temple sa China.
Uban ni WEKAF Chairman Emeritus Supreme Grandmaster Dionisio Cañete nga isaka sa Hall-of-Fame mao sila si 'Noy Cacoy' O. Cañete, Bonifacio 'Loloy' Uy, Isidro Casio, Andres 'Cano' Cañete, Nick Elizar, Rodrigo Maranga, Prudencio 'Ondo' Caburnay, Felix 'Tenciong' Gutang, Pacito Velez, Alfredo Carin ug Ramon Rosada.
Uban usab ang US-based awardees nga sila si Arnulfo 'Dong' Cuesta, Alfredo Bandalan, Max Palen, Vincent Cabales, Leo Giron, Remy Presas Jr., Carlos Patalinghug Jr. ug Dexter Labonog.
Sa laing bahin, moabot na ngadto sa 700 eskrimadors gikan sa 29 ka nasud sa kalibotan ang mikompirmar sa ilang partisipasyon sa WEKAF Championship. (BANAT SPORTS)