Keiz BJ motocross round 7 mosikad na

CEBU, Philippines - Kun moduyog ang panahon ug magpadayon ang kainit sa haring adlaw nga mohabol sa kalangitan, ang mga molupyo sa Pagsabungan ug kasilinganang barangay maoy unang makasaksi sa talagsaong hitabo sa pagsikad sa Round 7 sa 1st Keiz BJ Motors Phoenix Cyclomax Titans Motocross Series nga uloha'g "Double Birthday Celebration Motocross Competition" karong adlawa didto sa Upper Pagsabungan racetrack sa Mandaue City.

Medyo mabara ang dagan sa trapiko sa nahisgutang barangay tungod kay kapin sa 100 ka riders gikan sa Sugbu ug sa ubang bahin sa Visayas ug Mindanao ang gilauman mopakita sa ilang katakus ning usa ka adlaw nga kompetisyon nga gipahaom alang sa adlaw'ng natawhan ni race director Romeo 'Romy' Ouano sa Hulyo 11 ug sa masaarong Cebuano rider nga si Kerry Keizer Ornopia sa Hulyo 13.

Si race organizer ug Keiz BJ Motors big boss Siegfred Ornopia, kinsa usa sab ka champion rider ug award-winning sportsman nagkanayon nga iyang gidapit ang mga dekalibreng riders sa nasud sama ni Kimboy Pineda, Winsor Famorca, Jesse Pineda, Cyril Tariman, managsuong Abellan nga sila si Juvenille ug Jovaniie ug uban pa aron molamas sa kulbahinam nga aksiyon.

Ilang sukdon ang katakus sa Sugbuanon ug multi-titled rider nga si Jon-Jon Adlawan sa expert division.

Ang garbo sa Pagsabungan nga si Earl Jean Brylle Ornopia modepensa sa iyang balwarte batok sa mga bisitang riders sama ni JP Galia sa Maasin City, Froilan Torralba, Andrei Gastador sa Daanbantayan ug JP Cuesta ubos sa mini 85cc. division, samtang ang iyang manghod nga si Ken Kerry mopakita'g aksiyon sa mini 65cc. class batok nila ni Mark Mendaros sa Talamban ug Peewee Galia sa Maasin City ug uban pang batan-ong riders.

Ang birthday celebrant nga si Keizer giatngan nga mokawat og atensiyon diin molumba siya ubos sa peewee division.

Sa laing bahin, ang mga riders nga napagngan og kahayag dili angay sa pagpakawala sa paglaum kay may kahigayonan pa sila sa pagpakita sa ilang abilidad ubos sa wanggits division.

Nanganti si Haojue Philippines marketing manager Edmund Pingkian, nga langkaton niya pag-usab ang nahanaw niyang korona nga iyang nasakmit atol sa Round 2. Ilabi na karon nga milig-on na usab ang iyang mga tuhod.

Lain pang kategoriya nga tigian mao ang beginners selection limited edition, beginners open production, local enduro, executive selection limited edition, executive A ug B, special event ug uban pa.

Ang usa ka adlaw nga kalihukan gisuportahan ni Engr. Jun Mahusay ug iyang pamilya, Pagsabungan Brgy. Capt. Andres Suson, Hon. Asterio 'Bubbles' Suson ug ubang barangay officials sa Pagsabungan.

Suportado sab kini sa Betonval Ready Concrete, Haojue Philippines, Engr. Juanito Gerona, Roel Maraño, Edmund Pingkian, Phoenix Phils. accounting manager Geoffrey Viñalon, Doning Goc-ong, Jeffrey Basalo, Reynante Tigue, RMO Motor Parts, Motolite ug Motormate Merchandising. (BANAT SPORTS)