Sukmagay sa Compostela

CEBU, Philippines - Isugal ni Philippine super flyweight champion Marco Demecillo Singwangcha ang iyang limpiyong rekord batok ni Jeffrey 'Relentless' Cerna sa Manila sa main event sa "Reign of Champions" sa Hulyo 22 didto sa Compostela Sports Complex.

Ang 21-anyos nga si  Singwangcha (17-0, 12KOs) lab-as pa sa iyang impresibong second round TKO nga kadaugan batok ni Marvin Mabait niadtong Abril 22 didto sa Mactan Shrine sa Lapu-Lapu City.

Apan ning higayona, si Singwangcha (17-0, 12KOs) mag-atubang og lisud nga tahas kay ang iyang sangkaon mao man si Philippine No. 8 bantamweight contender nga si Cerna (12-5, 5KOs) nga isog nga nakigsinukmagay ni ALA boxer Arthur Villanueva niadtong Hunyo 2 didto sa Resorts World Manila.

Napilde hinuon si Cerna sa maong away pinaagi sa "split decision," apan napakita sa maong boksidor ang iyang kaisog.

Sa supporting main event, si Adonis TI Yamagata Aguelo makigharong ni Jerry Nardo sa Bacolod City alang sa interim Phl featherweight championship, samtang si Redondo Singwangcha makigsangka ni Eman Labanza alang sa PBF super featherweight title.

Mokompleto sa boxing card mao ang sangka nila ni Jherpaul TI Yamagata Valero batok Romnick Magos, Rajah Renoel Pael batok Louie Arlos ug Ardie TI Yamagata Boyose batok Arnel Caoktoy.

Ang maong fight card gipasiugdahan sa RWS Promotions International ni Rex 'Wakee' Salud, Thai promoter Naris Singwangcha ug TI Yamagata Promotions uban sa suporta ni Compostela Mayor Joel Quiño. (BANAT SPORTS)