Ortiz nanghawod sa Bantayan chessfest

CEBU, Philippines - Naghari si Bhell Ortiz sa gipahigayong Bantayan Town Fiesta Open Chess Tournament didto sa maong lungsod.

Si Ortiz sa Brgy. Putian, mitapos sa 7-round Swiss competition bitbit ang 6.0 puntos ug nakigtabla nila ni Michael Tinga sa Brgy. Sulangan ug Jeremy Pepito sa Daanbantayan.

Apan si Ortiz maoy mibulsa sa top prize nga P5,000 tungod sa highest tie-break output gamit ang Bucholz system.                                             

Si Tinga nga mipahiluna sa ikaduha nakadawat og P3,000, samtang si Pepito gigantihan og P1,000 sa pagpahiluna sa ikatulong dapit.

Sila si Dindon Masong ug Ahmad Morsalim sa Bogo City parehong miiskor og 5.5 puntos aron mopahiluna sa ikaupat ug ikalima nga dapit.

Sa high school division, si Shaira Mae Monsalud sa Bantayan maoy kampiyon pinaagi sa iyang 5.0 puntos,   gisundan nila ni Jasper Doldea sa Bogo nga mirehistro og 4.5 points ug John Winston Velasco sa Bantayan NHS sa iyang 4.0 points.

Si Jethro Pacifico sa Madridejos Central School mao usab ang top performer sa elementary division.

Miabot sa 70 ka mga chess players gikan sa nagkadaiyang chess clubs nga sakop sa Fourth District sa lalawigan sa Sugbu nga gilangkuban sa Madridejos, Bantayan, Sta. Fe, San Remigio, Daanbantayan, Medellin, Tabogon, Tabuelan ug Bogo, gipasiugdahan sa Bantayan Fiesta Sports Committee ubos sa liderato ni Mayor Ian Christopher G. Escario.

Si Ms. Nicanora Sendon maoy nagsilbeng tournament manager sa abag sa BSHS/BNHS teachers, samtang si JO2 Edwin T. Monsalud milingkod isip chief arbiter uban sa Bantayan District jail personnel.

Gipaluyohan sab kini ni US-based Lawisanon chess patron Josito Clamor Dondon Glen Cecilio Lepiten, Maria Estrellite Yamamoto ug Reynaldo Despi. (BANAT NEWS)