MMA showdown sa Mandaue karong gabii
CEBU, Philippines - Makasaksi na sab ang mga Sugbuanon og kulbahinam nga Mixed Martial Arts (MMA) showdown pinaagi sa "Who Are You?: Unleash D' Unstoppable" karong gabii didto sa Mandaue City Cultural and Sports Complex.
Sa main event sa maong fight card nga gipasiugdahan sa SOMA Kickboxing Club, ang ground fighting specialist nga si James Joel 'Spider' Sereño makigbinukbukay ni Jafet 'Smiling' Flores sa Komjukai Aikijutsu.
Gawas sa Sereño-Flores bout, laing atngan mao ang sangka sa upat ka fighters sa Yaw-Yan ArDigma-Cebu Top Team ubos sa giya ni Master Benigno 'Ekin' R. Caniga Jr.
Sila si Renante 'Limbas' Noblefranca, Geronimo 'Daredevil' Etac, Rolando Nacua, Jr. ug Slotty Avila tinguhang mokulit og daog aron ipamatuod nga angayan sila ibutang sa maong elite squad.
Sangkaon ni Noblefranca si Jose Leo 'D Bull' Rodrigo, samtang si Etac moharong ni Arnel Ylanan ug sila si Nacua ug Avila makigbinukbukay nila ni Moises Nudalo ug John Edu Torbiso.
Mokompleto sa fight card mao ang sangka nila ni Jepol Noquera batok Axel Torbiso, David Po batok Sherwin Pugales, Marcelino Abayle batok Edmar Sumbi ug Cyrus Noquera batok Lanly Palagtiw.
Ang MMA event magsilbe usab nga fund-raising event alang sa KAABAG Women Foundation sa Mandaue City.
Ang mga tiket nagkantidad og P100 sa general admission, P150 sa lower box ug P500 sa VIP/ringside. (BANAT SPORTS)
- Latest
- Trending
