P50T giandam sa 2nd Sonshine Radio Run
CEBU, Philippines - Moabot ngadto sa P50,000 nga ganting salapi ang giandam alang sa mga mananaog sa 2nd DYAR Sonshine Radio Half Marathon nga mosikad sa Hulyo 22 didto sa The Terraces sa Ayala Center-Cebu.
Hinuon, giklaro ni Sonshine Radio officer-in-charge William Valencia nga walay apil ang mga langyaw'ng runners ilabi na ang mga Kenyans sa maong ganting salapi.
Nagkanayon si Valencia nga ila kining gihimo aron paghatag suporta sa mga local runners. Mahimong makasalmot ang mga langyaw'ng runners, apan dili sila makadawat og ganting salapi bisan pa og modaog.
Naglaum si Valencia nga moabot ngadto sa 3,000 ka runners ang moapil sa ikaduhang edisyon sa lumba nga magsilbeng charity run sa ilang estasyon.
Gawas sa 21K half marathon, laing kategoriya nga tigian mao ang 12K, 6K ug 3K fun run.
Ang registration fee nagkantidad og P600 sa 21K, P350 sa 12K ug P300 alang sa 6K ug 3K.
Ang tanang finishers sa 21K category makadawat og specially-designed medals.
Mahimong magparehistro sa RUNNR sa Ayala Active Zone, Toby’s Sports sa SM City-Cebu, Wow Travel and More ug Cebu City Sports Center. (BANAT SPORTS)
- Latest
- Trending
