12th cesafi MOULBO sa hulyo 29

CEBU, Philippines - Masukod ang talento sa Sugbuanong basketball legend nga si Julian Macoy isip head coach sa University of San Carlos (USC) Warriors dihang ang iyang koponan makigsangka sa University of San Jose-Recoletos (USJ-R) Jaguars sa opener sa 12th Cebu Schools Athletic Foundation Inc. (CESAFI) nga moulbo sa Hulyo 29 diha sa Cebu Coliseum.

Si Macoy, kinsa mihimo'g kasaysayan sa local basketball   nga adunay labing daghang iskor nga nahipos sa usa lang ka duwa, motapak sa gibakantihang puwesto ni Mike Reyes, kinsa mao karon ang assistant ni Raul 'Yayoy' D. Alcoseba sa Southwestern University (SWU) Cobras.

Ang garbo sa Dumanjug, Cebu mipatik og talagsaong rekord sa makaduha ka higayon atol sa iyang panahon isip collegiate star sa USC Green ug Gold Warriors gikan niadtong 1955 hangtod sa 1961.

Sa iyang rookie year sa 1957, si Macoy miiskor og 101 puntos sa ilang duwa batok sa Cebu Normal School (Cebu Normal University)

Pagka sunod tuig, si Macoy mihimo og laing rekord nga wala pa matarog hangtod karon dihang miiskor siya og 126 puntos sa ilang duwa batok sa Cebu School of Arts and Trades (CSAT) nga karon Cebu Technological University (CTU).

Si CESAFI commissioner Felix 'Boy' O. Tiukinhoy Jr. miingon nga sugdan nila og sayo ang CESAFI season aron ilang mahuman ang liga sa Septiyembre.

"We will kick off the 12th CESAFI season with the usual pomp and pageantry highlighted by the Grand Palabas on July 29. We are starting it early because our target is to finish it by September," matud pa ni Tiukinhoy atol sa coaches' meeting kagahapon didto sa USJ-R Conference Room.

Walay kausaban sa rules and regulations gawas lang sa ubang amendments nga naglakip sa two-year residency rule nga ipatuman karon nga season. Ang mga players nga nakasilbe na og usa ka tuig nga residency sa miaging tuig gitugtan na sa pagduwa.

Ang torneyo mosubay og single round robin format sa eliminasyon. Ang top seed awtomatik nga moabante sa semifinals, samtang ang second hangtod sa ikapito nga qualifiers ang moduwa pa sa quarterfinals diin ang No. 2, 3 ug 4 teams makabaton og "twice-to-beat" advantage batok sa kinaubsan nga mga koponan.

Ang mga modaog makig-uban sa No. 1 team sa semis diin moduwa sila og laing round robin. Ang top two magsangka alang sa kampiyonato sa usa ka "best-of-five" series. Ang sangka alang sa ikatulong dapit pinaagi sa "best-of-three" series.  (BANAT SPORTS)