MANILA, Philippines - Sinuklian ang paghihirap ni San Miguel Beermen shooter Leo Avenido sa elimination round nang siya ang hirangin bilang Most Valuable Player sa hanay ng mga locals na naglaro sa 3rd AirAsia ASEAN Basketball League.
Si Avenido ay nagtala ng 14.86 puntos kada laro na pinakamataas sa mga locals para tulungan ang Beermen na maging number one matapos ang triple-round elimination sa 17-4 baraha.
Ang SMB ang ikatlong koponan na nilaruan ni Avenido matapos sumabak din sa Brunei Barracudas at Singapore Slingers pero ito lamang ang unang pagkakataon na nanalo siya ng MVP mula sa mga coaches na siyang bumoto sa ibinigay na individual awards.
Tinalo niya sa parangal sina AirAsia Philippine Patriots guard Al Vergara at Indonesia Warriors guard Mario Wuysang.
Ang iba pang binigyan ng award ay si Patriots import Anthony Johnson bilang Best Import, Warriors coach Todd Purves at import Steve Thomas bilang Coach of the Year at Defensive Player of the Year.