Coaches sa Cordova gipangleksiyon

CEBU, Philippines - Daku karong hagit sa mga sports officials sa lungsod sa Cordova ang pagdisiplina sa ilang mga basketball coaches ilabi na ang tigpasiugda sa nagpadayong 6th Mayor Addy Sitoy's Cup didto sa Cordova Sports Complex.

Malipayon karon sila tungod kay misanong sa ilang awhag ang mga hingtungdan, kinsa wala pa makasabot kun unsay "proper bench decorum" sa ilang mga duwa matag gabii.

Si councilor Simgil 'Em-em' Sitoy, kinsa mao sab ang overall chairman sa Cordova Sports Committee nagkanayon nga ila nang gihinay-hinayan og disiplina ang mga reklamador nga coaches.

Sa iyang bahin, si Boy Allan Lataza nga sakop sa technical committee, nagkanayon nga daghan kaayong mga coaches nga wala masayod kun unsay ilang responsibilidad sa team ug gani bisan ang mga assistant coaches gusto sab ilhon nga head coach.

Gawas kang Sitoy ug Lataza,   laing sports officials sa Cordova nga mitambong kagahapon sa senemanang SCOOP forum ni host Bobby Inoferio   mao ang mga sakop sa technical committee nga silang Antonio Pogoy ug Michael Villarin ug SK chairman   Argeo Toring.

Adunay kinatibuk-ang 46 ka teams ang misalmot sa 6th Mayor Addy Sitoy's Cup -- 28 niini sa juniors division, 18 sa SK division, unom sa Open division ug upat sa seniors division.

Gawas sa basketbol, may torneyo sab sa volleyball, tennis ug chess.  (BANAT SPORTS)