PKF nagpili og bag-ong opisyales

CEBU, Philippines - Nagpili og mga bag-ong opisyales ang Philippine Karatedo Federation (PKF) uban sa dakung paglaum nga kining mga bag-ong panagway lakip ang bag-ong presidente, dawaton unta sa mga kadagkuan sa Philippine Olympic Committee (POC).

Si Jose D. Manansala, Jr. maoy napiling presidente samtang si Otto Antao maoy napiling bag-ong bise-presidente.

Gihimo ang piniliay didto sa Pages Hall sa Teachers’ Camp sa Baguio City niadtong Mayo 23. Sa maong piniliay, gipili sab si Rey Mendoza isip vice president for Mindanao, Erlando Metante isip vice president for Visayas, Ruperto Torres isip vice-president for Southern Luzon, Joel Madrona isip vice-president for Northern Luzon ug Edward Ponce, Jr. isip vice-president for NCR.

Ang mga bag-ong napiling opisyales adunay terminong upat ka tuig nga matapos unya sa 2016 sumala sa lagda sa PKF Charter ug By-Laws.

Ang PKF gi-ila sa POC sukad pa niadtong 1987 ug sa Philippine Sports Commission sukad sa 1990 apan ang kanhi representante ngadto sa POC Council nga si Mr. Go Teng Kok, gipalagpot tungod sa iyang pakig-away kang  POC president Peping Cojuangco.

Tungod niadto, wala ilha sa POC ang mga opisyales sa PKF nga ilang gipili sa usa ka pekeng pinilliay nga gimani-obra nilang Enrico Vasquez ug Raymond Lee Reyes ug mga kauban.

Gi-ingon nga illegal nga nakakuha'g approval sa POC ang grupo nilang Vasquez aron makadumala sa operasyon sa PKF.

Gideklarar ang pagkapili nilang Vasquez ug kaubanan nga "null and void" ni Judge Rodolfo R. Bonifacio sa Pasig RTC Branch 159. (BANAT NEWS)