Korona tuyo karon sa Prime Asia

CEBU, Philippines - Paglangkat sa korona maoy bugtong tuyo sa Prime Asia/UV Lancers sa ilang pakigsangka batok sa Kia Motors/CIT-U Wildcats sa Game-3 sa "best-of-five" championship series sa 6th CESAFI Partner's Cup diha sa Cebu Coliseum.

Ang duwa gitakda alas-5 sa hapon.

Human modaog sa opener, 76-66 ug sa Game-2, 80-77 alang sa ilang 2-0 nga bentaha, ang Prime Asia naghinam-hinam na karon nga mosakmit sa titulo.

Mobalik na sab karon sa pagduwa ang nasuspensong si Andrew Avillanoza sa Prime Asia ug Lloyd Sanchez sa Kia Motors nga parehong na-ejected sa Game-1. Apan wala karon sa ilang bench ang coach sa Kia Motors nga si Gilbert Demape, kinsa gitawgan og duha ka technical fouls.

Dili hinuon kaayo makahatag og dakung epekto ang pagbalik ni Avillanoza tungod kay mas mopuntos pa si Wowie Escocio sa ilawom. Gawas sa duha, si UV Lancers coach Felix 'Donbel' Belano Jr. magsandig sab nilang John Abad, Phil Mercader, Eman Calo, Chris Perolino, Raffy Oktubre ug Vincent Mendoza.

Sa laing bahin, ang Kia Motors magsalig sab nilang Vincent Menguito, Allan Dimco, Gestoni Baclaan. Axel Rabaya ug ang beteranong si Floyd Taboada. (BANAT SPORTS)