Tuburan Siglakas open chessfest

CEBU, Philippines - Dul-an sa 100 ka players ang mopakita'g aksiyon sa Tuburan Siglakas Open Chess Tournament nga gikatakda sa Hunyo 2-3 didto sa plaza sa nahisgutang lungsod.

Si Richard Natividad, kinsa maoy kampiyon sa bag-o lang natapos nga Mayor Celestino 'Junnie' E. Martinez Jr. open chess tournament maoy mangu sa mga title contenders nga sila si Anthony Makinano, Eden Diano, Diego Claro, Bonn Tibod, Allan Pason, Peterson Sia, Carlos Tan, Kylle Sevilleno ug Rommel Ganzon.

Ang torneyo mosubay og 7-round Swiss system format.

Gawas sa mga tropeyo ug medalya, ang kampiyon mobulsa og P8,000, ang second placer makaangkon og P5,000, ang third makaangkon og P3,000, samtang ang fourth placer gantihan og P2,000.

Ang 5th hangtod sa 10th placers hatagan og P1,000 matag usa, samtang ang 11th ug 15th makadawat og consolation prize nga P500 matag usa.

Alang sa dugang pang mga kasayoran, mahimong mokontak ni Marvin Ruelan sa 0926-7352951.

Ang maong torneyo usa lang sa mga kalihukan sa tinuig nga kapistahan sa Tuburan agi'g pahinungod sa ilang mahal nga patron San Antonio de Padua sa Hunyo 13. (BANAT SPORTS)