Lion Tiger mitiklo sa San Marino

CEBU, Philippines - Nagmangtas ang Lion Tiger Katol/USJ-R Jaguars sa third quarter ug nakabangon human gilubo'g 16 puntos aron moiskor og daog batok sa San Marino Corned Tuna/USPF Panthers, 73-70 sa Game-1 sa "best-of-three" series alang sa ikatulong puwesto sa 6th CESAFI Partner's Cup kagahapon didto sa Cebu Coliseum.

Si James Regalado mibahog og walo ka triples alang sa iyang 26 puntos aron hungitan ang Lion Tiger og 71-70 nga bentaha sa nahabiling 20.9 segundos, apan si Jason Olbedado maoy nangu sa kadaugan pinaagi sa iyang 31 puntos lakip na ang iyang mahingdanong free throws sa himalatyong oras   nga maoy nagselyo sa duwa.

Ang San Marino gipangulohan ni Joseph Sedurifa, kinsa miugkat og 19 puntos, gisundan ni Fritz Dajalos nga adunay 18 puntos.

Sila si James Ferraren ug Art Camello nagkumboya og 25 puntos alang sa San Marino. - BANAT NEWS