KIA motors vs. Prime Asia sa 6th Partner's Cup FINAL

CEBU, Philippines - Mikambiya og game-high 26 puntos si playmaker Floyd Taboada ug si Jestoni Baclaan mikimada og 15 puntos alang sa Kia Motors/CIT-U Wildcats pag-ihaw sa Lion Tiger Katol/USJ-R Jaguars, 78-74 aron makuha ang katapusang lingkoranan sa finals sa 6th CESAFI Partner's Cup kagabii didto sa Cebu Coliseum.

Nakaiskor lang og otso puntos si Vincent Menguito, apan nakakawat kini og salida dihang kalmado siyang mipasud sa iyang free throws nga naghatag sa Kia Motors og katungod sa pakigharong sa topseed Prime Asia Lending/UV Lancers sa "best-of-five" championship series nga sugdan unya sa Martes.

Sikit kaayo ang aksiyon sa unang tulo ka kuwarter nga miresulta sa pito ka panagtabla, ang katapusan, 46-all sa 3-pointer ni Banjo Capillar dihang ang Kia Motors milusad og 9-2 rally aron moposte og 55-48 nga labaw sa nahabiling 2:30 sa third period.

Ang maong bentaha, gikalingawan og kitkit sa Lion Tiger ug gani nailog pa nila ang labaw, 66-65 sa nahabiling 3:53 sa duwa, apan wala kini magdugay sa ilang mga kamot. Katapusang nakalabaw ang Lion Tiger sa iskor nga 68-67 kay ang Kia Motors miarangkada gamit ang 8-2 run aron ilogon ang labaw, 75-70 sa katapusang 47 segundos sa duwa.

Nahulga ang Kia Motors dihang ang Lion Tiger kalit nga misikit pinaagi sa sunod-sunod nga   baskets ni James Regalado sa nahabiling 18 segundos.

May purohan nga matabla ang duwa o modaog pa gani, apan si Capillar misipyat sa iyang 3-pointer.

Si Menguito, kinsa gi-foul ni Regalado kalma kaayo mipasud sa iyang duha ka free throws nga maoy mikandado sa kadaugan. (BANAT NEWS)