6th UV Scrabble Challenge banatan karon
CEBU, Philippines - Gitakda na karong adlawa ang 6th University of the Visayas Scrabble Challenge diha sa multi-titled room sa UV-main campus.
Gubat kini tali sa karaan ug sa bag-ong henerasyon sa mga magduduwa.
"This will be a competition among the old and new generation of scrabble players in Cebu as this is open to players of all ages," matud pa ni Teodoro Martus, ang no. 1 scrabble player sa nasud, kinsa mao sab ang defending champion.
Ang tinuig nga kompetisyon bukas sa tanang high school, college o professional scrabble players.
Si Martus gipaabot nga magsagubang og lisud nga duwa gikan nilang Nathalie Cabaluna sa University of San Jose-Recoletos, Dart Eslao ug kaubang Visayanians nga sila si Jowar Ayuno ug Joy Policher.
Sila si Ayuno, Policher ug Cabaluna mga representante sa World Youth Scrabble Championships didto sa Malaysia duha na ka tuig ang nilabay.
Aduna kini registration fee nga P200 alang sa college ug professionals ug P100 alang sa mga entrante sa high school. Ang registration himuon sa alas-8 hangtod sa alas-8:30 sa buntag atol sa adlaw sa kompetisyon.
Ang kampiyon mobulsa og P2,500, samtang ang second ug third placers makadawat og P1,800 ug P1,000 matag usa. Ang fourth ug fifth makaangkon og P500 ug P200. (BANAT SPORTS)
- Latest
- Trending
