CEBU, Philippines - Usa ka zumbathon ang molamas sa 26th edition sa Mr. Perfect Body bodybuilding competition karong Domingo sa hapon didto sa Activity Center sa Pacific Mall (Super Metro) sa Mandaue City.
Ang dance marathon, nga sugdan sa ala-1 sa hapon, pagadumalaon sa tulo ka lisensiyadong Zumba instructors nga sila si Marco Brigoli, Dario Tagalog ug Fernando Ungria.
"The zumbathon is open to the public for free. Not only that, we have also prepared many prizes for the winners," matud pa ni Nancy L. Yukayguan, ang tag-iya sa Mr. Perfect Body.
Gawas sa zumbathon, lain pang mohatag og kinabuhi sa kalihukan mao ang awarding sa Perfect Body's biggest losers nga si Ric Anthony Buglay, kinsa nakibhangan og 747 pounds sud sa walo ka bulan, ug Christian Yap, kinsa nalaslasan og 80.5 pounds sa usa ka tuig.
Kapin sa P10,000 nga ganting salapi ang giandam alang sa mga mananaog sa tinuig nga kompetisyon ubos sa tema: "Health is more than wealth."
Gawas sa mga tropeyo ug medalya, ang kampiyon mobulsa og P5,000, samtang ang second ug third placers makadawat og P3,000 ug P2,000 matag usa.
Ang fourth hangtod sa sixth placers gantihan og P500, P400 ug P300 ug ingon man medalya.
Gikuhang mga hurado ni Yukayguan mao sila si Ben Andales (Mr. Philippines 1987), Henley Uy (licensed international bodybuilding judge), Noli Tolentino (Mr. Perfect Body 1987, Mr. Philippines 1990 ug Mr. Bikini Open 1991) ug Ely Delgig.
Ang pre-judging himuon sa Mayo 26 gikan sa alas-2 hangtod sa alas-4 sa hapon didto gihapon sa Pacific Mall.
Alang sa dugang mga kasayoran, mahimong mokontak ni Melanie o ni Marilyn sa 328-0506. BANAT NEWS