CEBU, Philippines - Misaad og impresibong daog si Muay Thai fighter Gino 'Projectile' Po batok ni kickboxer Junrey Soquite aron ipamatuod nga mas ngilngig ang iyang disiplina sa martial arts sa ilang panag-abot sa Muay Thai Challenge 2012 karong gabii didto sa J Centre Mall sa Brgy. Bakilid, Mandaue City.
Talagsaon kining maong away tungod kay ipakita sa mga fighters sa matag kampo niini kun asa sa duha ka matang sa combat discipline ang mas epektibo.
Si Po, kinsa usa usab ka Mixed Martial Arts (MMA) fighter, nagkanayon nga ipagawas niya ang tanan niyang hinagiban aron mahatagan og dungog ang Muay Thai, usa ka karaang matang sa martial arts nga nagagikan sa nasud sa Thailand.
"Basi sa akong experience sud sa ring, dili gyud nimo matagna kun kanus-a nimo matumba imong kontra, pero usa man ko ka heavy-hitter maong daku og posibilidad nga ako siya (Soquite) ma-knockout," matud pa ni Po.
Sa supporting bout, ang batos ni Po nga si Neil Bacatan makigharong ni Kerk Florida sa ATC Kickboxing, samtang duha ka fighters sa Bullet Muay Thai nga sila si Leo Rodrigo ug Moses Nadalo makigsangka nila ni John Edu Torbiso sa Durex Dragon ug Edcel Julom sa ATC Kickboxing.
Mokompleto sa fight card nga libre sa publiko mao ang sangka ni Donald Tubod batok Axel Torbiso, Marvin Rabonos batok Kimmuel Cabahug, Dennis Berjay batok Gary Cabahug ug Dino Codinera batok Yanyan Villanueva. (BANAT SPORTS)