CEBU, Philippines - Kapin sa P10,000 nga ganting salapi ang gitagana alang sa mga mananaog sa Mr. Perfect Body Bodybuilding Competition 2012 nga gikatakda sa Mayo 27 diha sa Pacific Mall Activity Centre sa Mandaue City.
"We're now on our 17th edition of this annual tournament. We were not able to hold one last year, but this time I decided to continue it due to the prodding of some local bodybuilders," matud pa ni Nancy L. Yukayguan, ang tag-iya sa Mr. Perfect Body.
Sa tema nga "Health is more than wealth," ang mokampiyon sa maong kompetisyon diin ang mga partisipante mopakita sa ilang maskuladong lawas, mobulsa og P5,000, ang second placer makadawat og P3,000, samtang ang third placer makaangkon og P2,000. Gawas sa ganting salapi, makadawat sab sila og tropeyo ug medalya.
Ang mopahiluna gikan sa ikaupat hangtod sa ikaunom gantihan og P500, P400 ug P300 ug ingon man medalya matag usa.Ang pre-judging himuon sa Mayo 26 gikan sa alas-2 hangtod sa alas-4 sa hapon didto gihapon sa Pacific Mall.
Sa dili pa ang kompetisyon sa Mayo 27, adunay pagahimuon nga Zumbathon gikan sa ala-1 hangtod sa alas-2 sa hapon. Bukas ug libre kini sa tanan.
Alang sa dugang pang mga kasayoran, mahimong motawag ni Melanie o di ba ni Marilyn sa 328-0506. (BANAT SPORTS)