Jaca balik sa ALA boxing

CEBU, Philippines - Adunay kahigayonan si former world title challenger Jimrex Jaca nga luwason ang himatyon niyang boxing career dihang gikuha siya pagbalik sa ALA Boxing Promotions.

Daghan ang nasurpresa sa gihimong desisyon sa ALA Promotions tungod kay kahinumduman, sila maoy naggiya sa karera ni Jaca, sa wala pa sila talikdi sa boksidor aron mopirma ni Spanish boxing promoter Rafael Sancho sa miaging tuig.

"Daku gyud ang pasalamat sa ALA sa pagsalig nila nako ug pagdawat nila pagbalik nako," matud pa ni Jaca. "Saad ko nga buhaton nako ang tanan aron makaaway pagbalik og world title."

Sa iyang bahin, si ALA Promotions president Michael Aldeguer nagkanayon nga nakahukom sila nga hatagan og laing kahigayonan si Jaca human usab kini personal nga miduol kaniya ug sa iyang amahan nga si boxing patron Antonio 'Bidoy' Aldeguer.

Si Jaca (34-6, 19KOs) miaway niadtong tuig 2006 alang sa WBO featherweight title, apan napilde ngadto ni Juan Manuel Marquez pinaagi sa ninth round TKO.

Gibutyag usab ni Aldeguer nga plano nila nga paawayon pagbalik si Jaca sa Hulyo sa undercard sa sangka ni AJ 'Bazooka' Banal didto sa Manila.  (BANAT NEWS)