Nietes, Melindo, Servania andam sa gubat sa "Pinoy Pride XIV"

CEBU, Philippines - Molarga na karong gabii ang ALA Boxing Gym fighters uban ang dakung paglaum nga modaog sa tagsa-tagsa nila ka away sa "Pinoy Pride 14: Night of Champions" sa Hunyo 2 didto sa Resorts World Hotel and Casino sa Manila.

Pangulohan ni two-division world champion Donnie 'Ahas' Nietes, ang mga ALA boxers nga moaway alang sa bakus mao sila si undefeated Milan 'El Metodico' Melindo ug Genesis 'Azukal' Servania.

Si Nietes manalipod sa labing unang higayon sa iyang WBO light flyweight title batok ni Mexican Felipe Salguero sa main event.

"Bisag unsaon nako og tan-aw sa iyang style, ako gyud nakita nga kaya ra kaayo nako siya," matud pa ni Nietes atol sa press conference kagahapon didto sa City Sports Club-Cebu.

Hinuon, wala mosaad og    knockout si Nietes, apan ang bugtong niyang gipasalig mao nga mohimo og impresibong daog batok ni Salguero.

Sama ni Nietes, masaligon usab sila si Melindo ug Servania nga modaog bisan pa og mga ngilngig ang ilang mga kontra nga si kanhi Colombian world champion Jesus Geles ug three-time world title challenger Genaro Garcia.

"Taas si Geles ug dili sab kabintahaan iyang style pero atangi kay aduna ko'y surpresa alang niya sa among away," matud pa ni Melindo, kinsa mosuway pagsakmit sa WBO International flyweight title.

Wala usab malisang si Servania bisan pa'g beterano nga si Garcia ang iyang atubangon. Sila si Servania ug Garcia mag-ilog sa bakanteng WBC silver super bantamweight title.  (BANAT NEWS)