Katatagan itataya ng Ateneo, UST belles

MANILA, Philippines - Mapanatiling malinis ang kanilang karta ang balak gawin ng nagdedepensang Ateneo at many-time champion UST sa pag­­bubukas ngayon ng 9th Shakey’s V-League quarterfinals na handog ng Smart sa The Arena sa San Juan City.

Ang Lady Eagles na hindi natalo sa tatlong laro sa Group A ay masusukat sa La Salle Bacolod sa alas-4 ng hapon habang ang Lady Tigresses ay makikipagtunggali sa FEU sa huling laro sa triple-header game dakong alas-6 ng gabi.

Magbubukas ng telon ay ang tagisan sa pagitan ng NCAA champion Perpetual Help laban sa Adamson University sa alas-2 ng hapon.

Ang San Sebastian Lady Stags na tumapos sa group elimination tangan ang 2-1 baraha at National University (0-3) ay pahinga ngayon at masasalang sa laban sa Martes.

Pinapaboran ang Lady Eagles dahil ang Lady Stingers ay may 0-3 karta sa yugtong ito.

Ang unang 2 laro ay mapapanood sa AKTV-13 sa Lunes mula ika-7 ng gabi habang ang mga laro sa Martes at Huwebes ay ipalalabas sa mga nasabing araw sa network mula ika-7 ng gabi.