Los Demonyous nakaikyas

CEBU, Philippines - Nakaikyas ang Los Demonyous ni Bads del Prado pinaagi sa pagpilde sa Super Idolz, 71-70 sa pagsugod sa second round sa Integrated Bar of the Philippines (IBP) 2012 summer basketball tournament didto sa Capitol Parish gym.

Gikontrolar sa Super Idolz ang unang tulo ka kuwarter diin miposte kini og 59-47 nga bentaha.

Nakan-an ang labaw sa final period dihang mi-rally ang Demonyous ug nakahimo pa kini sa pagtabla sa iskor, 69-all sa basket ni Lito Ortiz sa nahabiling 14.7 segundos.

Ang fastbreak ni Edward Bauzon maoy mikandado sa kadaugan. Si Bauzon maoy nangu sa Los Demonyous uban ang 23 puntos, samtang si Ortiz miamot og 15 puntos.

Silang Fermin Pepito ug Benjo Macion may nangu sa Idolz nga nagkumboya og 43 puntos.

Sa laing duwa, ang Pecandela Law Firm ni skipper Mark Russ Gamallo miihaw sa Bhutakalz, 82-74.

Ang sentro nga si Gamallo mao sab ang nangu sa iyang team nga mikulit og game-high 25 puntos, gisundan nilang Jessie Capoy ug Ivans Gamallo nga adunay 15 puntos matag usa.

Silang Resty Arnaiz ug Van Ligutan nagkumboya’g 29 puntos alang sa pilderong Bhutakalz.

Midaog sab ang Eagles ni Kit Enriquez batok sa Primos of Rama Clan, 76-66, samtang gilatigo sa Paneros ang Jodin sa iskor nga 64-48.

Si Marvin Miralles maoy nangu sa Eagles sa iyang 16 puntos, silang Jan Vallecer ug Ian Santos adunay 13 puntos matag usa. Samtang si Al Limalima maoy nangu sa Primos sa iyang 24 puntos.

Ang Pañeros gipangulohan ni Ruel Juban pinaagi sa iyang 16 puntos, si Dennis Aliño miamot og 15 puntos, samtang si Ting Ordeniza mitampo og 13 puntos. (BANAT SPORTS)