Ocon-Singwangcha midaog sa PBF title
CEBU, Philippines - Miiskor og 9th round stoppage si Fernando 'Batang Bato' Ocon-Singwangcha batok ni Aroel 'Baby Lion' Romasasa aron sakmiton ang Philippine Boxing Federation (PBF) flyweight crown sa miaging gabii didto sa San Fernando Sports Complex sa lungsod sa San Fernando, habagatang bahin sa Sugbu.
Nagbinayloay og nagpungasi nga kumo ang duha ka boksidor atubangan sa 3,000 boxing fans, apan nahutdan sa kusog ang boksidor gikan sa General Santos City nga si Romasasa.
Sa tantong binukbukay, kalit lang mitalikod si Romasasa ug wala na makapanagang sa iyang kaugalingon nga nakapugos ni referee Tony Pesons pag-undang sa away sa nahabiling 28 segundos sa ninth round.
Sa maong kadaugan si Singwangcha mipalambo sa iyang rekord ngadto sa 10-1, 2KOs, samtang si Romasasa nakahiagum sa labing una niyang pilde sud sa 10 ka away.
Sa supporting bout gipaundang usab ni Jason Redondo-Singwangcha si Rey Vincent Liparanon sa 1:23 sa fourth round, samtang si Sonny Katiandagho mipatumba ni Bryan Maano sa round four.
Pulos midaog pinaagi sa unanimous decision sila si Lester Pronco ug Jesson Inso batok nila ni Gelbert Magos ug Joel Soterol, samtang nanginahanglan lang og 25 segundos si Francisco Singwangcha aron patikangkangon si Dodong Tubo.
Miresulta sa "majority draw" ang sangka nila ni Jun Ryan Quimbo ug Kenny Singwangcha.
Ang maong boxing card gipasiugdahan sa RWS Promotion International ni Rex ‘Wakee’ Salud ug Thai boxing patron Naris Singwangcha uban sa suporta ni San Fernando Mayor Antonio 'Abe' Canoy. (BANAT SPORTS)
- Latest
- Trending
