FitFil Fitness Camp andam na

CEBU, Philippines - May 26 na lang ka nahabiling luna alang niadtong buot mosalmot sa Cebu leg sa "FitFil Fitness Camp" nga sugdan karong Mayo 15 didto sa The Terraces sa Ayala Center-Cebu.

Ang dul-an usa ka buwan nga fitness camp gibuak sa beginners, weekend warriors, athletes ug elite athletes.

"We're opening the camp only to the first 200 registrants. This will be the biggest outdoor fitness camp ever held here," matud pa ni event manager ug former "Biggest Loser" contestant Alan G. Choachuy atol sa press conference kagahapon didto sa Big Mao sa Ayala Center-Cebu.

Gawas sa The Terraces, laing mga binyu sa fitness camp mao ang Linear Park nga anaa sa tunga sa Cebu Holdings ug City Sports Club-Cebu ug Phase 3 sa Cebu Business Park luyo sa Colegio de la Inmaculada Concepcion.

Ang fitness camp sessions ipahigayon matag adlaw'ng Martes ug Huwebes gikan sa alas-6 sa gabii hangtod sa alas-8 sa gabii ug sa adlaw'ng Sabado sa alas-6 sa buntag hangtod   sa alas-8 sa buntag.

Nagkadaiyang paagi sa fitness program ang masinati sa mga partisipante sama sa TRX, boxing, yoga, pilates, circuit ug P90. Aduna usab mga exercise briefing, nutrition counseling ug mga raffle draws nga ipahigayon matag session.

Niadtong interesadong moapil, ang registration nagkantidad og P1,000. Adunay on-site registration didto sa Active Zone sa Ayala Center-Cebu.

Alang sa dugang mga detalye, mahimong motawag sa numero 422-6204, 344-5958, 420-4154, 0923-7344081, 0917-3205768 o mobisita sa www.coachjimsaret.ph.  (BANAT SPORTS)