CEBU, Philippines - Ang University of San Carlos (USC) North Campus misandig ni Dolan Adlawan aron tagakon ang ilang sister-team USC-South, 64-55 sa overtime ug aron sakmiton ang katapusang luna sa semifinals sa Coca-Cola PBA Youngstars Basketball Tournament 2012 Cebu Leg sa miaging adlaw didto sa SHS-Ateneo gym sa dalan Gen. Maxilom avenue.
Gipangulohan ni Clint Suelto ang USC North pinaagi sa iyang 17 puntos, samtang si Adlawan miamot og 15 puntos. Ang natagak nga USC South gipangulohan nilang Ralf Camacho ug Paul Galinato nga nagkumboya og 16 puntos.
Ang USC North (2-1) nakig-uban sa Sacred Heart School-Ateneo de Cebu-1 (3-0), Cebu Eastern College (3-0) ug University of the Visayas (2-1). Gipukan sa SHS-Ateneo ang Thumbs Up, 58-34 sa usa ka non-bearing game, gilubong sa CEC ang USPF, 55-38 ug gipalagpot sa UV ang SHS-Ateneo-2 sa iskor nga 87-45.
Ang Coca-Cola PBA Youngstars Basketball Tournament 2012 usa ka nationwide competition tali sa mga players nga nagpanuigon og 13 ngadto sa 16-anyos. Matag team adunay tulo ka 13-anyos, tulo ka 14-anyos, tulo ka 15-anyos ug tulo sab ka 16-anyos.
Ang kampiyon sa Cebu maoy morepresentar ngadto sa Visayas regional karong Mayo 19-20 didto sa Bacolod ug ang Visayas champion maoy mokumbati sa Manila alang sa national finals sa Mayo 27 ngadto na sa Hunyo 1. (BANAT SPORTS)