CEBU, Philippines - Pulos milkulit ug managlahing daog ang Sacred Heart School-Ateneo de Cebu 1 (SHS-AdC), University of San Carlos (USC) North Campus ug ang Cebu Eastern College (CEC) atol sa opening day sa Coca-Cola Philippine Basketball Association Youngstars Basketball Tournament kaniadtong Sabado didto sa SHS-AdC gym sa dan Gen. Maxilon avenue, ning dakbayan.
Sikit ang kadaugan sa SHS-AdC kinsa naka-eskapo batok sa USC South, 52-49 samtang naka-ipsot sab ang USC North batok sa Thumbs Up, 49-45 ug sa ikatulong duwa, gipakuratan sa (CEC) ang University of the Visayas (UV) 62-54.
Si Jair Igna maoy nangu sa Magis Eagles sa iyang 18 puntos lakip ang duha ka krusyal kaayong free throws aron molabaw ang SHS-AdC, 50-49 lead ug human makahimo'g turnover ang USC South turnover, si Popoy Navarro maoy miselyado sa kadaugan pinaagi sab sa iyang duha ka free throws sa nahibiling sayis segundos sa duwa.
Si Paul Galinato maoy nangu sa USC South sa iyang 15 puntos.
Sikit sab kaayo ang kadaugan sa USC North batok sa kugihan nga Thumbs Up. Si Dolan Adlawan maoy nangu sa USC North pinaagi sa iyang 17 puntos samtang si Charles Singson miposag 15 puntos alang sa Thumbs Up.
Sa kataposang duwa, Silang Alfonso Alivizo ug Michael Balankig parehong mihakot og 12 puntos alang sa CEC samtang sila si Mark Berdera ug Chris Dominic Yap mi-iskor og 11 ug 10 puntos matag usa.
Midaog sab sa unang adlaw sa kumpetisyon ang University of Southern Philippines (USPF) human sa ilang 46-40 nga desisyon batok sa SHS-Ateneo 2.. - BANAT NEWS