Kapin sa 1,000 runners moapil sa 5th Mayor's Cup Run

CEBU, Philippines - Kapin na sa usa ka libo ka runners ang kompirmadong modagan sa 5th Mayor’s Cup Run nga mosikad karong Domingo diha sa Parkmall, Mandaue City.

Si Democrito ‘Imok’ Branzuela, ang tsirman sa Mandaue Runners Club (MRC) nga maoy modumala sa lumba, naglaum nga makab-ot nila ang ilang “target” nga 2,000 ka runners.

Gibuak-buak ang lumba ngadto sa unom ka kategoriya -- 15K open, 15K masters (50-year old and above alang sa men’s ug/ 40 year-old and above sa women’s), 7K open, 7K inter-barangay, 3K inter-barangay ug 1K inter-barangay.

Mokabat ngadto sa P160,000 nga ganting salapi ang giandam alang sa tanang mananaog sa matag kategoriya diin ang top three finishers makadawat sab og tropeyo matag usa.

Ang champions sa 15K open makadawat og P8,000, ang second placers mobulsa og P5,000 ug ang third placers makaangkon og P3,000. Hatagan sab og ganting salapi ang motapos gikan sa ikaupat hangtod sa ikanapulo nga puwesto.

Sa 15K masters, mokampiyon sa men’s ug women’s mobulsa og P3,000 matag usa, mopahiluna sa ikaduha makadawat og P2,000 ug ang ikatulo makaangkon og P1,000. Ang mopahiluna gikan sa ikaupat hangtod sa ikanapulo gantihan og P500 matag usa.

Ang top three finishers sa 7K open makadawat og P3,000, P2,500 ug P1,500 matag usa.

Sa inter-barangay categories, ang mosulod sa top 10 finishers makadawat og ganting salapi matag usa.

Adunay special awards nga ihatag alang sa “oldest runners” sa 15K ug “youngest runners.”

Ang registration nagkantidad og P200 alang sa 15K open ug P7K, samtang P150 sa 3K ug 1K.

Mahimong magparehistro sa Mandaue Sports Complex, Cebu City Sports Center, Parkmall ug sa Banilad Town Centre. Ang registration hangtod na lang karong adlawa.

Ang tinuig nga lumba nga gipasiugdahan sa Mandaue Sports Commission ubos sa liderato ni Executive Sports Commissioner Atty. Hidelito S. Pascual, gisuportahan sa Runway Tires, Omega Pro, Parkmall, Gleam Signs, Pocari Sweat, Helen Colina, Alberto’s Pizza, Male Oriental Cafe, ARA Forwarder, Rox Energy, Bebong’s Cake & Pastries, BG Nylon, Aqua Soft, Aqua Blue, Rose Pharmacy, St. Jude ug DyAB/ABS-CBN.  (BANAT SPORTS)