Puwestuhan Sa Huling Semis Slot

MANILA, Philippines - Iinit ang tagisan para sa ikalawa at huling para sa awtomatikong se­m­i­finals slot sa pagsabak sa aksyon ng tatlo sa apat na koponan na nasa ikalawang puwesto sa PBA D-League Foundation Cup ngayon sa San Juan Gym.

Unang sasalang ang Big Chill laban sa Boracay Rum sa ganap na alas-3 ng hapon bago saksihan ang mainit na tagpuan ng RnW Pacific Pipes at Cebuana Lhuillier dakong alas-5 ng ha­pon.

Ang Super Chargers, Steel Masters at Gems ay kasalo ng pahingang Blackwater Sports sa ikalawang puwesto tangan ang 4-2 karta kaya’t mahalaga ang resultang makukuha ng tatlong nauunang ko­po­nan para sa asam na pagkopo sa insentibong ibibigay sa mangungunang dalawang koponan.

Selyado na ng two-time defending champion NLEX Road Warriors ang isang semis seat dahil sa walang dungis na 6-0 baraha.

 Galing sa 73-61 panalo laban sa Junior Powerade ang tropa ni coach Robert Sison at kailangan nilang maipakita ang winning form dahil ang Waves ay may ipinagmamalaking 2-game winning streak para manatiling palaban sa quarterfinals slot kahit nagkaroon ng 0-3 start.

Isa pang panalo para sa bataan ni coach Lawrence Chongson ang magpapatibay sa kapit nila sa mahalagang ikaanim na puwesto sa 10-koponang liga.

Sa format ng kompetis­yon, ang apat na mangu­ngulelat matapos ang single round robin ay ma­ma­ma­hinga na.

Tututukan din ang bakbakan sa tampok na laba­nan dahil ang mananalo ay mananatili sa ikalawang puwesto habang bababa sa ikatlo ang matatalo.

Di hamak na mas be­te­ranong koponan ang Gems na humirit ng 101-84 panalo sa Blackwater Sports sa huling asignatura para makatikim din ng pa­nalo matapos ang dalawang laro ang bagong upong headcoach Beaujing Acot.

Pero hindi dapat magkumpiyansa ang Gems da­hil mainit ang Steel Masters matapos makapag­lu­bid-lubid ng apat na sunod na panalo upang bale­walain ang dalawang sunod na kabiguan sa kaagahan ng torneo.

“Ang maganda sa team ay gumaganda na ang takbo bawat laro,” wika ni RnW Pacific Pipes coach Alfredo Jarencio.