Alferez midaog titulo sa Head-Smart netfest
CEBU, Philippines - Milangkat og titulo ug first runner-up honors si Zethley Mae Alferez aron modaog isip best player sa Cebu leg sa 2012 Head-Smart Junior Tennis Satellite Circuit sa miaging adlaw didto sa Cebu International Tennis Center Inc. (CITCI) courts sa Laray, Consolacion.
Si Alferez nidominar sa girls 12 division pinaagi sa pagmasaker ni Elizabeth Abarquez, 6-0, 6-0. Napakyas si Alferez pagkulit og dobleng kadaugan human siya miyukbo ngadto ni Alyssa Mae Bornia, 7-5, 6-1 sa girls 14 final.
Sa laing bahin, si Hannah Espinosa misakmit sa korona sa girls 18 human niya gipilde si Andrea Regino sa Davao, 6-0, 6-3.
Hapsay ug walay babag ang kalampusan ni Espinosa tungod kay wala moapil ang iyang higpit nga karibal nga si Sally Mae Siso tungod sa PRISAA National Collegiate Games diin si Siso nisalmot ilawom sa Central Visayas.
Si Fritz Satera naghari sa boys 18 human gimakmak si Rodolfo Barquin, 6-2, 6-0.
Sa girls 16 class, si Krissiane Kintanar maoy nanghawod human gidispatsar si Dominique Ong, 6-4, 6-0, samtang si Allian Abdulqoabar sa Zamboanga maoy nidominar sa boys 16 category.
Si Fernando Arguelles Jr. miangkon sa boys 14 title pinaagi sa pagpilde ni Clyde Dujali, 6-3, 3-6, 10-5, samtang si Joshua Regino midaog sa boys 12 division title sa makutas nga duwa batok ni Francis Lambayan, 6-7, 7-4, 12-10.
Sa unisex 10 under, si Nonito Pepito maoy miangkon sa titulo uban ang 6-3, 6-2 nga kadaugan batok ni Rupert Tortal. (BANAT SPORTS)
- Latest
- Trending
