CEBU, Philippines - Mitampo og bulawang medalya alang sa Central Visayas ang marathon champion nga si Mary Joy Tabal dihang iyang gidominar ang 10,000m run women’s division sa 2012 Private Schools Athletic Association (PRISAA) National Collegiate Games didto sa Cebu City Sports Complex.
Ang kanhi Milo National Marathon ug Cebu City Marathon placer nga si Tabal mitapos sa lumba sa oras nga 40:18.75 batok nila ni Michelle Ann Sampang (42:50.02) sa Region 9 ug Mercy Taypoc (44:00.00) sa CAR.
Ang garbo sa Southwestern University (SWU) nga si Tabal wala magdahom nga modaog tungod kay kuwang siya sa ensayo tungod sa injury sa iyang tiil
Niadtong Martes, si Tabal nikubkob sab og gold sa 5K ug 3K run.
Sa kasamtangang standing sa medal tally, ang Region 7 padayong nag-una nga mitigom na og 55 ka golds, 25 ka silvers ug 34 ka bronzes.
Nailog na sa Western Visayas ang ikaduhang dapit human mihakot og 35 golds, 28 silvers ug 27 bronzes, samtang ang giilogan nga Calabarzon adunay 28 gold, 23 silver ug 28 bronze medals. (BANAT SPORTS)