Buwenamano sa Lady Stags, Eagles
MANILA, Philippines - Humataw si four-time Most Valuable Player Jang Baulee ng 24 hits at pangunahan ang San Sebastian sa 26-24, 25-12, 25-18 paggiba laban sa Letran College sa pagsisimula ng Shakey’s V-League ninth season kahapon sa The Arena sa San Juan.
Sunod na makakasagupa ng Lady Stags sa Group B ang Adamson Lady Falcons bukas kung saan hangad nilang iposte ang 2-0 baraha.
Sinayang ng Letran ang kanilang 24-20 kalamangan sa first set kung saan naman ito sinamantala ng San Sebastian.
Umiskor si Analyn Joy Benito ng 8 points, habang may 7 points si Rubie de Leon at nagdagdag si Dafna Robinos ng 7 hits para sa Recoletos-based squad.
Naglista naman si Patcharee Sangmuang, dating team captain ng Thailand national team, ng 11 hits para sa Letran, habang may 9 points naman si Joy Cases.
Samantala, dinuplika rin ng Ateneo ang magandang debut game ng Baste matapos umiskor ng 25-17, 25-18, 19-25, 25-15 panalo laban sa Far Eastern U sa isa pang laro.
Nagsanib ng puwersa ang power-hitting local crew na sina Fille Cainglet, Alyssa Valdez at Dzi Gervacio na nagsumite ng 45 hits para sa Lady Eagles habang nagdagdag naman si Thai import Lithawat Kesinee ng 13 points, tampok ang 3 block para sa Ateneo.
- Latest
- Trending
