6th Cong. Durano Cup 2012 buksan ugma
CEBU, Philippines - Buksan na ugma ang gikahinaman nga 6th Cong. Red Durano Cup 2012, 19-Under Inter-town basketball tournament didto sa Carmen Sports Complex.
Si councilor Roy Melgo, kinsa mao usab ang chairman sa torneyo karong tuiga mipahibawo nga daku ug mabulokon ang pormal nga pagbukas sa torneyo.
Miabag sab si Alex Dela Torre aron pagseguro nga magmalampuson ang kalihukan sa paugnat sa kusog sa maong lungsod.
Napulo ka lungsod nga sakop sa ikalimang distrito ubos ni Kongresista Red Durano ang mosalmot sa maong torneyo nga naglakip sa Borbon, Sogod, Catmon, Carmen, Compostela, Liloan ingon man ang mga lungsod sa Pilar, Tudela, Poro ug San Francisco.
Mga magdudula gikan dakbayan sa Danao ang mosalmot sab sa maong torneyo.
Matud pa ni Melgo, nga si Cong. Durano mao gayod ang mangulo sa pagbukas sa torneyo uban sa mga mayor gikan sa nagkalain-laing mga lungsod.
Ang tinuig nga kalihukan sa paugnat sa kusog kabahin sa programa nga gipalapdan ni Cong. Durano.
"To promote sportsmanship, fair play, development of the moral values of athletes, and foster good relationship and goodwill among the member towns of the 5th district of the Province of Cebu," maoy tuyo ug tumong sa maong torneyo. (BANAT SPORTS)
- Latest
- Trending
