Dodie boy mi-ko ni Buckie

CEBU, Philippines - Natubag ni Dodie Boy Peñalosa Jr., lisud nga pagsuway nga iyang nasugatan human niya gi-knockout ang beteranong Indonesian nga si Alex Buckie sa main event sa ‘Dugong Kampeon V’ kagabii didto sa Mandaue City Sports and Cultural Complex.

Bisan pa og midaog siya pinaagi sa KO, dili sayun ang giagian ni Peñalosa tungod kay kini ang labing unang higayun nga milungtad ngadto sa taas nga round ang iyang away.

Si Peñalosa nailhan nga usa ka bangis nga knockout puncher ug sa wala pa ang iyang sangka ni Buckie, walo na ka boksidor ang iyang gipakatug sud sa unang upat ka rounds.

Tungod niini, naluya si Peñalosa ug kinahanglan pa kini nga gamitan og oxygen ug wheel chair samtang gigawas didto sa Mandaue Sports Complex paingun sa usa ka ambulansya aron dad-on sa tambalanan. Ang 22-anyos nga boksidor naglisud pagginhawa dihang giatake siya sa asthma.

Milungtad og dugay si Buckie bisan pa sa kakusug sa kumo ni Peñalosa tungod usab sa kanunay nga pagkober ni Buckie sa iyang nawung ug tagsa ra usab kini mulabay og kumo.

Napatumba ni Peñalosa ang Indonesian sa fourth round, apan mibawos og atake si Buckie kinsa gikuhaan og puntos human kupti sa liog sa wala pa sumbaga si Peñalosa.

Naluya si Peñalosa sa istilo sa Indonesian, apan pag-abot sa ninth round, usa ka makabungog nga left straight ang gibuhian sa Pinoy boxer nga mipahayang ni Buckie sa 2:32 sa maong round.

“Nindot kay nasuwayan iyang stamina,” matud pa sa boxing promoter ug uyuan ni Dodie Boy Jr nga si Gerry Peñalosa. “Daku na og chance nga mahinayon siya og away sa undercard ni Manny Pacquiao sa June.”

Sa supporting bout, midaog sa usa ka kontrobersiyal nga split decision si Michael Farenas batok ni Jayson Egera sa Negros Oriental, samtang gipahayang usab sa manghud ni Dodie Boy Jr. nga si Dave Peñalosa si Jumar Torreon sa 1:54 sa second round. (BANAT NEWS)