CEBU, Philippines - Pormal na nga buksan ang Private Schools Athletics Association (PRISAA) National Collegiate Games 2012 diha sa bag-ong gipanindot nga Cebu City Sports Center (CCSC).
Gipaabot nga mabulukon ug hudyaka ang masinati sa opening ceremonies nga gikatakda sa alas-3 sa hapon.
Mga nagkalain-laing festivals dinhi sa Sugbu lakip na ang "Pasigarbo sa Sugbo" ug nagkadaiyang rehiyon ang ipaila pinaagi sa ilang tagsa-tagsa ka sayaw.
Nagkahayag ang kampanya sa Central Visayas alang sa ilang "back-to-back" titles tungod kay nakaangkon kini og "homecourt advantage."
Matud pa ni PRISAA National President Fr. Vicente 'Vic' L. Uy, SVD nga ang rehiyon 7 daku'g purohan nga makadepensa sa ilang titulo tungod kay gawas sa homecourt advantage, ang ilang higpit nga karibal nga National Capital Region (NCR) dili moapil sa ikaduhang higayon ning tinuig nga kompetisyon.
"Personally, I believe that we have a good chance to retain the title this year without the presence of NCR but we will not be that complacent as we also have other tough contenders for the crown. We will not settle for second place. We will do our best to get the championship," matud pa ni Fr. Uy.
Usa sa mga prominenteng indibidwal, kinsa motambong sa opening salvo mao si business tycon ug sports patron Manny Pangilinan.
Ang star player sa Southwestern University nga si Danika Yolanda Gendrauli maoy mangu sa "oath of sportsmanship," samtang ang modagkot sa urna pangulohan sa tulo ka mga representante gikan sa Luzon, Visayas ug Mindanao. Ang table tennis player nga si Bona Dane Tormis sa University of Cebu (UC) maoy morepresentar sa Visayas.
Mga duwa nga tigian ning usa ka semana nga kompetisyon naglakip sa basketball, baseball, beach volley, indoor volleyball, sepak takraw, softball, football, athletics, swimming, boxing, badminton, chess, karatedo, lawn tennis, taekwondo, judo, dancesport ug table tennis. (BANATNEWS)