Nagpanikad na mga atleta alang sa PRISAA

CEBU, Philippines - Naghinam-hinam na ang mga atleta nga mosalmot sa 2012   Private Schools Athletics Association (PRISAA) National Collegiate Games 2012, usa sa labing dakung sporting events sa Sugbu nga buksan ugma diha sa Cebu City Sports Center (CCSC).

Moabot sa 3,054 ka mga atleta ug delegado gikan sa mga pribadong tunghaan ug unibersidad sa nagkadaiyang rehiyon dinhi sa nasud ang mosalmot sa opening ceremony ugma sa alas-3 sa hapon.

Napulo'g-unom (16) ka koponan ang seguradong mosalmot nga gipangulohan sa defending champion ug host   Region 7 uban sa Region 1, 2, 3, 4-A, 4-B, 5, 6, 8, 9,10,11,12, CAR, CARAGA ug ARMM.

Si PRISAA official Bernard Ricablanca nagkanayon nga siyento porsiyento na nga andam ang Cebu City sa pag-host sa maong event ilabi na ang bag-o lang nahuman nga rubberized track oval sa CCSC.

Dugang pa ni Ricablanca nga adunay ribbon cutting ceremony nga pagahimuon sa bag-ong track oval nga tambungan ni Cebu City Mayor Michael 'Mike' Rama.

“Ang atong venue kay well equipped, well lighted ug well prepared," matud pa ni Ricablanca atol sa press conference kagahapon didto sa CCSC function room.

Si PRISAA regional head Fr. Vicente Uy, SVD, miingon nga daku ang kahigayonan sa Region 7 nga mohimo og "back-to-back" championship ilabi na nga wala ang NCR.

Ang mga atleta magtigi sa nagkadaiyang sports disciplines sama sa basketball,   beach volleyball, football, softball, volleyball, athletics, badminton, boxing, chess, dancesport, karatedo, lawn tennis, swimming, table tennis, taekwondo ug   cultural competitions sama sa vocal solo ug Miss Mutya.  (BANAT SPORTS)