Rambol sa Mandaue sports complex
CEBU, Philippines - Magbinukbukay na si undefeated Dodie Boy Peñalosa Jr. ug Indonesian fighter Alex Buckie sa main event sa "Dugong Kampeon V" karong gabii didto sa Mandaue City Cultural and Sports Complex.
Ipamatuod na ni undefeated Dodie Boy Peñalosa Jr. nga angayan siyang mahatagan og kahigayonan nga moaway sa undercard sa Manny Pacquiao-Timothy Bradley showdown pinaagi sa pag-knockout ni Buckie.
Ang anak ni kanhi two-division world champion Dodie Boy Peñalosa ug pag-umangkon ni ring icon Gerry Peñalosa mosuway pagkulit sa iyang ikasiyam nga sunod-sunod nga daog.
"100% ready na gyud ko ning awaya," matud pa ni Peñalosa. "Di ko makasulti unsa nga round, pero akong mapasalig nga dili ni kaabot og round 10 among away."
Atol sa official weigh-in kagahapon didto sa Games and Amusement Board (GAB) office, si Peñalosa yano kaayong mikuha sa 122 lbs. weight limit, nagpasabot nga andam na kini, samtang si Buckie mitimbang og 123 lbs.
"Niingon sila brawler daw ni iyang kontra (Buckie) mao nang di sa mi mokompiyansa, among panid-an ang unang tulo ka rounds sa dili pa nako ipasumbagay og todo sa akong anak," segun pa sa amahan nga si Dodie Sr.
Si Buckie maoy ikatulong langyaw'ng kontra ni Peñalosa human nila ni Thai Superjames Singmanasak ug Kongfah Kiatpracha nga pulos nangapilde.
Gawas ni Peñalosa, moaway sab si Philippine featherweight champion Michael Farenas batok ni Jason Egera, samtang ang manghod ni Dodie Boy nga si Dave Peñalosa moharong batok ni Jomar Torreon. (BANAT SPORTS)
- Latest
- Trending
