Nagkumboya'g 78

CEBU, Philippines - Nagkumboya og 78 puntos ang tandem nilang Kevin Durant ug Russell Westbrook alang sa Oklahoma City Thunder dihang ilang gipukan ang host Minnesota Timberwolves kagahapon, 115-110 sa nagpadayong National Basketball Association (NBA) didto sa Target Center sa Minneapolis, Minnesota.Nagkumboya og 78 puntos ang tandem nilang Kevin Durant ug Russell Westbrook alang sa Oklahoma City Thunder dihang ilang gipukan ang host Minnesota Timberwolves kagahapon, 115-110 sa nagpadayong National Basketball Association (NBA) didto sa Target Center sa Minneapolis, Minnesota.

Miburak og 43 puntos si Durant ug miposa'g 35 puntos si Westbrook uban sa iyang walo ka assists aron baswaton ang Thunder kinsa nagpabiling no. 1 sa Western Conference bisan pa sa kadaugan sa San Antonio Spurs batok sa Phoenix Suns nianang gabhiona, 105-91.

''I don't think we ever thought we'd be putting Randolph on Westbrook in the fourth quarter and whoever on Durant, we were trying anything to find answers,'' matod pa ni Timberwolves coach Rick Adelman.

Si Durant maoy mi-iskor og 16 puntos sa kataposang 7 minutos sa duwa alang sa Thunder kinsa naghupot karon og 44-16 nga baraha ug labaw lang og usa ka duwa batok sa Spurs apan nagtabla sila sa loss column.

Human sila mapilde og sagunson duha ka duwa sayo ning buwana, midaug na sab ang Thunder og upat sa miaging lima ka duwa. ''We want to win as much games as we can going down to the stretch of the season,'' nagkanayon si Durant.

Midugang pa gyud siya sa pag-ingon ''Hopefully we get the no. 1 seed. If not, we've just got to keep playing. We can't worry about that. We've just got to worry about how we can get better every single game.''

Si Anthony Randolph mihimo'g double-double alang sa Timberwolves kinsa adunay 22 puntos ug 11 ka rebbounds apan si Michael Beasley maoy nangu sa iyang 26 puntos. Napilde na'g siyam ka sunod-sunod nga duwa ang Timberwolves ug ika-26 nga pilde sa gikan niadtong 2009.

Wala makaduwa ang star sa Wolves nga si Kevin Love kinsa dunay piang. Mihakot og 25 puntos si J.J. Barea alang sa Wolves uban sa iyang 10 ka assists apan misipyat sila og 12 ka free throws.

Ang three-pointer ni Barea maoy mipasikit sa duwa sa iskor, 110-112 sa nahibiling 13.8 segundos apan mibawos dayon si Westbrook kinsa maoy miselyado sa duwa pinaagi sa iyang duha ka free throws diin mihimo sila'g 28 sa 32 ka tirada sa maong departamento.

Miamot og otso puntos si Serge Ibaka uban sa iyang 12 ka rebounds ug lima ka blocks.

Napilde na sab ang Wolves sa miaging duha ka duwa batok sa Thunder--- 104-100 sa season opener niadtong Disyembre 25 sa miaging tuig ug 149-140 pinaagi sa high-scoring ug makutas kaayong double overtime game didto sa Oklahoma City kaniadtong Marso 23 apan sulod sa maong duha ka pilde, wala makaduwa si Love.

Wala sab si Love kagabii ug dugay na sab nga wala makaduwa silang Ricky Rubio kinsa adunay piang sa tuhod ug si Luke Ridnour kinsa adunay piang sa tikod.

Sa laing duwa, midaug ang L.A. Clippers batok sa Golden State, 112-104, midaug ang Boston batok New Jersey, 94-82, midaug ang Cleveland batok Washington, 98-89, gibihag sa Memphis ang Utah, 103-98 ug midaug ang Indiana batok Milwaukee, 105-99. (NBA.com)