2012 MS Motosuit Motocross series mobalik pinaagi sa back-to-back legs

CEBU, Philippines - Sunod-sunod nga lumba maoy mosugat sa pagbalik sa 2012 MS Motosuit Motocross Series sunod semana didto sa San Remigio, Cebu ug sugdan kini pinaagi sa 1st Tambongon Youth Motocross Festival sa Abril 21.

Gipaluyohan sa Petron Philippines ug sa Du Ek Sam, ang third leg sa tinuig nga lumba magsilbeng 14th edition sa gikahinaman nga Ornopia Cup nga gikatakda sa Abril 21 didto sa Brgy. Calambua, San Remigio.

"This is in keeping with our tradition. The spread of motocross of Cebu started in Calambua, that is why we're making sure that the event would become bigger and better each year," matud pa ni MS Motosuit big boss Lou Ornopia.

Ang Sel-J Sports executive nga si Jay Lacnid, ingon man ang numero unong rider sa Mindanao nga si Ted Conde motuyo pag-anhi sa Sugbu aron mosaksi sa duha ka kalihukan.

Matud pa ni Ornopia nga iyang ipahibalo ang mga detalye sa umaabot nga mga lumba atol sa senemanang SCOOP-Cebu Forum karong Abril 19 diha sa Baseline Restaurant.

Human sa Calambua, ang aksiyon mobalhin ngadto sa Panugnawan, Medellin uban sa pagpahigayon sa labing unang Panugnawan Motocross Competition sa Mayo 19.

Ang fifth leg nga pagauloha'g "Mayor Butch Sepulveda Motocross Cup" gitakda sa Mayo 29 didto sa Brgy. Logo, Borbon. (BANAT SPORTS)