BRO National Football festival gitakda

CEBU, Philippines - Dul-an sa 200 ka koponan ang mipadayag sa ilang partisipasyon sa BRO National Football Festival nga gikatakda sa Abril 20-22 diha sa Aboitiz Sportsfield sa Brgy. Subangdaku, Mandaue City.

Bisan tuod og wala kini ganting salapi, kasagaran sa mga kahugpongan dinhi sa Sugbu padayong mibubo og suporta ning tulo ka adlaw nga kalihukan.

Mga koponan gikan sa San Carlos City, Dumaguete ug Tacloban ang nipadayag sab sa ilang pagsalmot sa maong torneyo.

Tungod sa kaapeki sa panahon, ang organizers mo-limit lang sa numero sa mga entrante    sa matag kategoriya gawas lang sa men's open ug Inter-BPO.

 Sa pagka karon, ang men's open division aduna nay 34 ka teams nga bahinon ngadto sa walo ka grupo. Ang top squad sa matag grupo moabante ngadto sa quarterfinals.

 Ang top four magsangka sa semifinals ug ang nahabiling duha maoy mag-ilog sa kampiyonato.

Ang laing mga kategoriya nga tigian mao ang players 7, 8 ug 9, boys 11, 12, 13, 14, 15, 16, 17, 18 ug 19, girls 15 ug 19, ladies open, executive 35 ug 40-pataas.

Gitugotan ang tanang teams sa pag-ilis og players sa dili pa ang ilang unang duwa.

Ang players 7 hangtod sa boys 11 moduwa og 9-a-side format, samtang ang uban mosubay og 11-a-side format. (BANAT SPORTS)