CEBU, Philippines - Ang garbo sa Bacolod City nga si Merlito 'Tiger' Sabillo manalipod sa iyang Oriental and Pacific Boxing Federation (OPBF) minimumweight title atubangan sa iyang mga katagilungsod sa "Pride of Negros" nga gipasiugdahan sa ALA Promotions.
Ang petsa ug ang challenger ni Sabillo mailhan karong adlawa sa ipahigayong press conference didto sa Bascon Hotel sa Bacolod City.
Si Sabillo (17-0, 7KOs) nga usa sa gitan-aw nga world title prospect sa ALA Promotions lab-as pa sa iyang unanimous decision nga kadaugan niadtong Enero batok sa beteranong Indonesian nga si Soffyan Effendi didto sa Waterfront Hotel.
Unang nahuptan ni Sabillo ang OPBF title niadtong Oktubre sa miaging tuig dihang iyang gipukan si Rodel Tejares-Singwancha pinaagi sa "unanimous decision."
Ang maong away undercard usab sa katapusang sangka ni two-division world champion Donnie 'Ahas' Nietes.
Uban ni Sabillo nga moaway sa maong boxing card mao ang mga Negros fighters nga sila si Melvin Gumban, Juren Labnordo, Lou Arlos ug Rey Morales. (BANAT SPORTS)