Pink milupig sa Green

CEBU, Philippines - Gisugat og daog ang Pink team human naka-eskapo batok sa Green team, 115-112 sa pagsugod sa Phase 3 Camella Homes Sunday Club basketball tournament 2012 didto sa Villas Magallanes gym sa Brgy. Agus, Lapu-Lapu City.

Nagmangtas ug walay nakapugong sa idlas kaayong si Ondo Casquejo diin mipabuhagay kini'g 34 puntos aron pangulohan ang Pink, kinsa nakarekober human mabiyai og singko puntos sa unang kuwarter.

Unang miarangkada ang Green ug mitali kini og 36-31 nga bentaha sa first period, apan ang Pink sa kombinasyon nilang Casquejo, Clied Malolot ug Rolly dela Pieza, daling nakabangon ug mao na ang nagkontrolar sa duwa.

Si Malolot mitampo og 27 puntos, samtang si Dela Pieza mikulit og 22 puntos alang sa maong kadaugan.

Ang biktimang Green team gipangulohan ni Jimboy Igot, kinsa mipabuhagay og 23 puntos, gisundan ni Allan Sepe sa iyang 22 puntos ug Amay Palad nga adunay 16 puntos. Sila si Roilan Sumilang ug Aparente mitikdol og 12 puntos matag usa.

PUNTOS MATAG USA

Unang duwa:

PINK (115) - Casquejo 34, Malolot 27, R. De la Pieza 22, Caro 8, Almacen 6, Pleños 4, Brañanola 3

GREEN (112) - J. Igot 23, Sepe 22, Palad 16, Roilan 12, Diongzon 12, Aparente 12, Andrino 9  (BANAT SPORTS)