Memphis no. 5 na

CEBU, Philippines - Gipukan sa Memphis Grizzlies ang Dallas Mavericks sa iskor, 94-89 kagahapon sa nagpadayong National Basketball Association (NBA) didto sa FedEx Forum sa Memphis, Tennessee.

Tungod sa maong kadaugan, mikatkat na karon sa ikalimang pwesto ang Memphis samtang misukarap ngadto sa ikawalong pwesto sa playoff spot ang Mavs apan duna pa hinoon silay higayon nga mo-abante balik sa ikalima o ngadto sa ika-unom nga pwesto. Sa miaging season, gitagak sa kanhi no. 8 seed Memphis ang no. 1 San Antonio Spurs sa first round sa playoffs aron mokulit og kasaysayan sa ilang franchise.

Mibahog og 25 puntos si Rudy Gay samtang miamot si Zach Randolph og 15 puntos ug 11 ka rebounds alang sa Memphis kinsa milabay sa ilang sayong 20 puntos nga abante, 29-9 sa first period.

“We’re now eighth or ninth, so we’ve got to fight,” matod pa ni Dallas forward Dirk Nowitzki kinsa maoy nangu sa Mavs sa iyang 17 puntos ug walo ka rebounds. “We’ve got to battle and win some games.”

Miposa og 14 puntos si Gilbert Arenas kinsa mihimo'g tulo ka triples sa maong duwa samtang si Mike Conley midugang og 12 puntos alang sa Memphis nga midaug na og pito sa ilang siyam ka duwa.

Ang mga puntos ni Arenas maoy mitabang sa Grizzlies nga makalahutay bisan pa sa rally nga gihimo sa Mavs sa second half.

Matod pa ni Conley ngadto kang Arenas “It’s like he’s a video game player. It’s just automatic. It’s fun to watch when he’s shooting like that, and we need that.”

Midason niini ang ilang coach nga si Lionel Hollins pinaagi sa pag-ingon “Gilbert hitting the 3's has been huge. He has brought in a new spirit for our guys, and it is contagious.”

Mihimo'g season-high 16 puntos si Brandan Wright alang sa Mavs samtang midugang og 14 puntos ang beteranong si Vince Carter ug si Shawn Marion mi-iskor og 12 puntos uban sa iyang 11 ka rebounds alang sa Mavs kinsa nahiagum na sa ilang ikaduhang sagunson nga pilde human sila moyukbo sa Portland sa overtime, 97-99 sa miaging gabii.

Ang Memphis sab karon maoy nakakuha sa ilang head-to-head tiebreaker batok sa Mavs pinaagi sa ilang season series nga 2-1 nga baraha.

“Looking at the standings should get us even more motivated. I’m not a big watcher of the standings, but for anybody that is, it brings to the forefront the urgency of the situation,”sumala pa ni Dallas coach Rick Carlisle.

Nakaapas ang Mavs gikan sa ilang 20 puntos nga biya ug misikit sa third period human sa basket ni Carter, 62-63 apan daling misirit ang Memphis ug mitubag sa mga tirada sa Mavs aron dili kini molampos pagsakmit sa labaw.

Mibalik unta'g sikit ang Mavs, 89-92 sa nahibiling 21.5 segundos apan nakapasulod og duha ka free throws si Randolph may sayis segundos ang oras ug nakailog si Marc Gasol og inbound pass aron pagselyado sa ilang kadaugan.

“Tough isn’t the word. It’s just frustrating in all aspects. We dug ourselves a deep hole,” matod pa ni Marion.

Misipyat ang Dallas og 13 sa una nilang 14 ka tirada ug mitapos sila'g 2 of 15 human sa first quarter. (NBA.com)