Echavez, Ocampo nanghawOd sa Bantayan Beach Games

CEBU, Philippines - Giharian nilang Loren Dale Echavez ug Keith Ocampo ang tagsa-tagsa nila ka dibisyon sa open water swim event sa 2012 Bantayan Beach Games sa miaging adlaw didto sa Sugar Beach Resort sa Sta. Fe, Bantayan Island.

Gitapos ni Echavez ang 5K swim sud lang sa 45 minutos ug 23.41 segundos, gisundan ni Rozelle Marie Diaz (55:11.6) alang sa ikaduhang dapit, samtang si Apriel Goden (57:33.3.) milublob sa ikatulo.

Sa iyang bahin, si Ocampo (42:20.2) mipilde ni Jess Arriola (43:12.52) alang sa men’s class title. Si Paul Jumamil maoy third placer sa oras nga 46:10.84.

Si Cynthjune Goden midaog sa 13-14 class sa oras nga 46:22.69, samtang giharian ni Joel Peconcillo ang 20-29 division sa oras nga 1:00.34.68 ug si Loveleinell Casidsid mikampiyon sa 30-39 category sa oras nga 1:04.07.09.

Sa 1.5K swim, si Michael Sasedor maoy nag-una sa oras nga 8:56 uban sa iyang mga runners-up nga sila si Junn Ramon Alfonso Pacheco (39:05) ug Maynard Sasedor (45:23).

Si Jung Cases maoy migawas nga mananaog sa 14K individual time trial competition sa oras nga 21:16.29. Sila si Kiko Lim (23:47.64) ug Raldy Vios (23:58.23) maoy miangkon sa ikaduha ug ikatulo nga dapit.

Didto sa Nature’s Park and Resort, si Welmar Saavedra maoy midaog sa premier class sa duathlon race sa oras nga 1:05.38. Gisundan nila ni Jun Endrina (1:15.51) ug Wendell Tac-al (1:15.6) nga miangkon sa mosunod nga mga dapit.

Si Andre Pacheco maoy nag-una sa 19-under class, samtang si Jun Endrina maoy kampiyon sa 20-29 ug si Carlo Dale Pacana sa   30-39 division.

Wala usab magpaiwit sila si Junn Pacheco ug Desiree Villadolid ug ilang giangkon ang kampiyonato sa kids duathlon sa oras nga 8:47.29 ug 36:30.06. (BANATNEWS)