Peñalosa batok Buckie sa Dugong Kampeon

CEBU, Philippines - Mag-atubang na sab og laing hagit si undefeated super bantamweight Dodie Boy Peñalosa Jr., ning higayona batok sa beteranong si Alex Buckie sa Indonesia.

Ang Peñalosa-Buckie showdown maoy main event sa "Dugong Kampeon V" karong Abril 21 didto sa Mandaue City Cultural and Sports Complex.

Lab-as pa gikan sa impresibo niyang first round knockout nga kadaugan batok ni Thai Superjames Singmanasak niadtong Enero didto sa Caloocan City, si Peñalosa mosuway pagkulit sa ikasiyam niyang sunod-sunod nga daog. 

Si Dodie Boy Jr., anak ni kanhi two-division world titlist Dodie Boy Peñalosa Sr. ug pag-umangkon ni Pinoy ring icon ug karon boxing promoter Gerry Peñalosa.

Sa supporting bout sa GerryPens Promotions ug GMA-7 boxing event, si Philippine Games and Amusement Board (GAB) featherweight champion Michael 'Hammer Fist' Farenas makigsangka ni former PBF super bantamweight king Jason 'Siaton Boy' Egera sa 10-round non-title bout.

Mopakita usab og aksiyon ang manghod ni Dodie Boy Jr. nga si Dave batok ni JR Salvador sa Mandaue City.

Mokompleto sa undercard mao ang sangka ni Ren Ren Ruiz batok Joebert Alvarez, Raymond Empic batok Rommel Bangirigo, Jhack Tepora batok Sherwin Caday, Jayson Borleo batok Jun Ryan Quimbo, John Kenan Villaflor batok Andrew Palas ug Margarito Moya batok Roel Sumabong. (BANAT SPORTS)