CEBU, Philippines - Sugdan na karong adlawa ang giatangang summer clinic sa Yaw-Yan Ardigma Martial Arts Federation Inc. didto sa fourth floor sa Coast Pacific Downtown Center atbang sa University of Cebu (UC)-Main campus sa Sanciangko Street, ning syudad.
Hinuon si Yaw-Yan Ardigma CEO/Founder ug Vis-Min director Master Benigno “Ekin” R. Caniga, Jr.,mipahibalo nga padayun gihapon silang manawat og mga estudyante bisan pa og nagsugod na ang summer clinic.
Ang Yaw-Yan usa ka martial arts nga mugamit sa nagkadaiyang parte sa lawas isip hinagiban sama sa sumbag, patid, head ug shoulder butts, siko, tuhod ug ground fighting.
Giawhag ni Caniga ilabi na kadtong mga kabatan-onan nga magtuon og martial arts karong panahon sa bakasyon inay hutdon ang oras sa mga computer games o mosulod sa bisyo.
Lakip sa mga kurso nga lakip sa maong Summer clinic mao ang arnis, boxing, fitness, Yaw-Yan Combat (self-defense), Yaw-Yan Ardigma System ug Mixed Martial Arts (MMA).
Sa dugang mga pangutana, mahimong mutawag sa numero 09324524999. - BANAT NEWS