3 O.T. sa inter-merchant

CEBU, Philippines - Tulo pa lang gani ka adlaw ang Inter-Merchant basketball league, nakasinati dayon ug makutas nga duwa ang BNK Auto Shop dihang nagkinahanglan pa sila'g tulo ka overtime periods aron pagpukan sa Miles Marketing sa iskor, 103-99 sa Group B sa North Division sa nahisgutang torneyo didto sa barangay T. Padilla gym, ning dakbayan.

Sa laing duwa, gilubong sa BDO-Taga Bangko ang St. Mark Hotel, 56-33 sa North Division Group A alang sa una nilang daog sulod sa duha ka duwa aron maka-angkon og 1-1 nga baraha.

Sa sangka sa South Division, midaug ang Parklane Hotel batok sa J Center Mall, 79-66 samtang gilubong sa Grace Bostolits ang City Sports Club, 85-64.

Nagtabla sa 79-all human sa regulation ang duha ka teams apan na-outscore sa BNK ang Miles sulod sa duha ka overtime periods,24-20.

Ang Miles Marketing gilangkuban sa pipila ka mas iladong players nga naglakip kanilang ex-USC Warrior Gino Gallarde kinsa mihimo'g 12 puntos sa overtime periods ug maoy nangu sa ilang team sa iyang 25 puntos. Ang iyang mga kauban naglakip sa kanhi niya teammate nga si Paul Joven ug ingon man kanilang Jason Estella, Dave Lim, Dave Ting ug Dennis Que nga pulos mibahug og double figures.

Laing maanindot nga duwa ang nahitabo dihang mihimo'g 14 ka three-pointers ang Grace Bostolits aron ipakita ang ilang abilidad.

Sa laing bahin, mibahug og 18 puntos si Dominic Gaviola ug midugang si Benjie Tomaquin og 11 puntos alang sa Parklane samtang si Julian Navaro ug Bryan dela Fuente maoy nangu sa J Center Mall sa ilang 20 ug 13 puntos matag usa.

Ang Inter-Merchant nga pagaduwaon matag Martes ug Huwebes sa duha ka benyu---T. Padilla gym ug Pope John Seminary hardcourt, gidumala ni Peter Lalican isip commissioner.  - BANAT NEWS