Tropang Texters Daog Abante Sa Semifinals

CEBU, Philippines - Mi-abante ngadto sa semifinals ang Talk n Txt Tropang Texters dihang ilang giproteksiyonan ang  ilang 18 puntos nga abante didto sa third period ug hingpit nilang napakgang ang uwahing rally nga gilusad sa Rain or Shine Elasto Painters sa fourth quarter aron mokulit og 102-90 nga kadaugan kaniadtong Sabado atol sa 2012 PBA Commissioner's Cup out-of-town game didto sa Hoopsdome sa Lapulapu City.

Epektibo kaayong opensa gikan sa ilawom ug sa iyang mga tirada sa perimeter ang import sa Tropang Texters nga si Donnel Harvey kinsa maayo sab ug pulso gikan sa free throw aron pangulohan ang iyang team pinaagi sa iyang 32 puntos uban sa 16 ka rebounds. Siya sab ang responsable dihang nakahuygo og nainat sa Tropang Texters ang ilang labaw sa 18 puntos may 1:24 sa third period human sa three-pointer ni Jason Castro, 75-57.

Nabuhi pagbalik ang dugo sa Elasto Painters dihang giduslitan ni Paul Lee ang usa ka rally diin sagunson nga puntos ang iyang gipakatap sa fourth period ug may kinatibuk-ang 10 puntos sa maong quarter aron mohakot og 18 puntos alang sa iyang team.

Mi-abang kaniya si Jeffrey Chan kinsa mitikdol og sayis puntos sa mao final period apan pakyas ang ilang tinguha kay kanunay mobawos ang Tropang Texters kinsa naghupot na karon og 6-2 nga baraha ug mao gihapo'y solo leader.

Ang Sugboanong si Joseph Ronald Quiñahan kinsa misipyat sa unang tulo niya ka tirada, igo lang miamot og kuatro puntos ug wala niya mapiog si Kelly Williams kinsa maoy iyang gidepensa-an.

Nakasustenir ang Tropang Texters bisan pa og nalupig ni Willard Crew sa rebound si Harvey. Si Crews maoy nangu sa Elasto Painters sa iyang 25 puntos ug 22 ka rebounds aron mahimong unang PBA import karon nga season nga makahimo'g 20-20 performance apan nahagsa sila ngadto sa 3-6 nga baraha.

Usa sa labing maanindot nga highlight sa duwa alang sa Tropang Texters mao ang kusog nga two-handed slam ni Japeth Aguilar apan sa wala pa matapos ang duwa, mipakita sab sa iyang abilidad si Crews kinsa milambos sa bola human lang siya makasinati og cramps.

Silang Chan ug Ryan Araña parehong mibahug og 13 puntos alang sa Elasto Painters.  - BANAT NEWS