Azkals wagi sa Palestine para sa 3rd place

MANILA, Philippines - Hindi nasayang ang pag­lalaro ng Philippine Az­kals sa 2012 AFC Challenge Cup nang angkinin ang ikatlong puwesto sa bisa ng 4-3 panalo laban sa Palestine sa pagtatapos ng kompetisyon kahapon sa Dasarath Rangasala Stadium sa Kathmandu, Nepal.

Si Phil Younghusband ay naghatid ng dalawang goals, ang magkapatid na sina Angel at Juan Luis Gui­rado ay may tig-isa, habang ang depensa ni goalie Eduard Sacapano sa maha­lagang atake ng The Fighters ang nagresulta para maitala ang pinakamagandang pagtatapos ng Pilipinas sa nasabing kompetisyon.

 May dalawang goals din si Abdulhamid Abuhabi para sa Palestine at nagkaroon pa ng pagkakataon na makagawa ng hat trick nang atakihin nito ang depensa ng Azkals sa puntong isang goal lamang ang naghihiwalay sa dalawang koponan.

Pero handa si Sacapa­no, pumalit sa puwesto ni Neil Etheridge na suspindido sa laban matapos big­­yan ng red card sa huling laro kontra sa Turkme­nistan na naisuko ng Azkals, 1-2.

 Ang inakalang libreng attempt ni Abuhabi at nilundag ni Sacapano upang mapalabas ang bola at maisalba ang kalamangan.

Tinapos ni Juan Luis Gui­rado ang labanan nang agawan ng bola ang uma­atakeng Palestinian para magdiwang ang mga su­por­ters at ibang kasapi ng Azkals.

Sa fourth minute ay bi­nuksan ni Younghusband ang iskoring nang maka-goal pero itinabala ito sa 21st minute ni Abuhabi.

Ibinigay ni Younghusband ang ikalawang goal sa isang penalty kick sa 24th minute bago pinala­wig ni Angel sa dalawang goal ang bentahe sa half­time(3-1) nang ang kanyang roller ay lumusot sa naghahabol na goalie ng Pa­lestine na si Ramzi Saleh.

 Si Abuhabi ang umangkin sa ikalawang goal ng kanyang koponan sa 66th minute at matapos ang goal ni Juan Luis ay idinikit uli ni Fahed Attal ang Palestine sa 4-3 nang masuwer­tehan na mapunta sa kanya ang bolang mainitang pinaglalabanan sa 77th minute.

Maliban sa bronze me­dal, maaari pang magkaroon ng isa pang award ang Azkals sa katauhan ni Younghusband na palaban sa Golden Boot award.

Ang anim na goals na ginawa ni Younghusband sa torneo ay mas marami ng tatlo kay Pak Nam Chol ng North Korea.

Kalaban ng North Korea ang Turkmenistan sa Finals at kung hindi makakarami ng goal si Pak, si Younghusband na ang hihi­rangin bilang best scorer ng torneo.