Pagara masuwayan batok Thailander

CEBU, Philippines - Masukod na usab ang abilidad sa fast rising ALA Boxing Gym prospect nga si Albert ‘Prince’ Pagara sa iyang pakigsangka sa Thai nga si Phupha Por Nobnou sa Pinoy Pride XIII sa Marso 24 didto sa Waterfront Cebu City Hotel and Casino.

Isugal ni Pagara ang iyang way buling nga 10-0, 8KOs record batok ni Nobnou kinsa maoy iyang ikaduhang langyaw nga kontrahon.

Ang 18-anyos nga si Pagara katapusang miaway niadtong Enero 15 batok sa beteranong si Louie Bantigue kinsa iyang gipahayang sa third round.

“Ganahan gyud ko sa boxing ug gusto ko nga mas mumaayo pa ani nga sport mao sab nga nag-train ko og maayo aron matuman akong damgo nga mahimong world champion,” matud pa ni Pagara.

Ang Pagara-Nobnou bout maoy undercard sa WBO Asia Pacific bantamweight title fight tali ni AJ ‘Bazooka’ Banal ug Mexican nga si Raul Hidalgo. - BANAT NEWS